* Startseite     * Archiv     * Gästebuch     * Kontakt     * Abonnieren




Webnews







STS Meeting 29. ond 30. September

ech weiss ech chome rächt spot met dem itrag aber ech han eifach ned so ziit gha. es god mega schnell verbii. es send etz ned e mol no 9 mönät öbrig.

also aber a dem wochenänd han ech es sts meeting gha ond alli hend mösse cho. mer hend ineme alte gfängnis öbernachtet (esch etz es hotel). d rüüm send die ehemalige zälle eifach mereri zäme wells sösch so chli wärid. ech be inere 2er zälle gsi met ere dütsche, de lea.

am nomi semmer go d parlamentsgebäude aluege. es esch eigentli ned werkli interessant gsi. oder mech heds ömu ned so interessiert. mer hend en füehrig gha. es paar sache send zwor scho no cool gsi. zom bispell d bibliothek. öpper hed gseid die ereneret ad bibliothek vo harry potter. es stemmt scho. ech weiss ned wie dass es uf de belder esch, aber wemmer si "in ächt" gseht esch es scho no idröcklech.

noch dere füehrig hemmer denn i groppe los chönne ond eifach e chli i de stadt gsi ond hend groppeföteli gmacht.

denn hemmer am viertel vor 7ni weder zrog mösse förs znacht. nochem znacht hemmer denn es meeting gha zom d regle bespräche ond wemmer gha hend froge beantworte.

nochem meeting esch weder freiziit gsi ond mer hend wäg chönne bis am 12i. ond etz chonts.... mami, 3 mol döfsch rote wo mer gsi send.... im.... HARD ROCK CAFE!!!!!!!!

mer send öppe am 11i weder zrog gsi ond hend denn no gred. es send mega vell scho gliner zrog cho. es esch no zemli chüehl gsi. ech be denn öppe bis am 2 ufblobe ond ha met verschedene lüüt gred. mer hend vorallem vo üsne familie aber au de schuel verzellt.

denn hemmer nor bis öppe am halbi 9ni chönne schlofe ond denn heds zmorge gä ond mer send weder hei gange.

das esch mis wochenänd gsi.

also ganz liebi grüess,

vanessa

10.10.07 23:33


Thanksgiving Wochenänd

hallo zäme,

do chond no de iitrag zom letschte wochenänd. ech weiss ech be chli hendedri aber onder de woche met de schuel han ech eifach ned so ziit.

also am friitig han ech frei gha, well PA-Day gsi esch. das esch glaub ech lehrerfortbeldig. be aber ned so secher. a dem tag ben ech met de adriana ond erere familie ufem boot ufem ottawa river go fahre. mer send bis zonere ensle wo zo quebec ghört gange, hend denn det picknickt ond hend denn am strand e chli gschlofe. es esch mega heiss gsi. denn semmer denn weder zrog ond mer hend es surfbrätt hende am boot agmacht gha ond d adriana ond ech send zersch det druf. mer send drofe gstande während i de adriana ere vater (ray) gfahre esch. mer hend mega vell spass gha. nochdem dass ech aber 2 mol is wasser gheit be han ech före afang mol gnueg gha. denn esch i de adriana eri muetter (lydia) ufs brätt. denn esch d adriana au nomol met erere muetter ond denn ben ech nomol met de adriana.

am samstig heds denn de ganz tag grägnet ond esch mega chalt gsi. ech has fasch ned chönne glaube, dass ech am tag voräne no im floss be go schwemme. d yuri esch bi erne frönde gsi i erere alte stadt ond d elspeth ond ech send go en dvd uslehne. er hed I AM SAM gheise ond esch en mega truurige. aber er esch mega guet. ech chan en nor empfähle. aber ech wörd en vellecht uf dütsch luege well uf änglisch esch es mega schwerig well d hauptperson esch en behenderete ond dä red mängisch e chli komisch ond ech han en mängisch fasch ned verstande.

am sonntig semmer denn zo de beamer (esch en fröndin vo de elspeth ond area rep bi sts), de marione (französischi ustuschschüeleri) ond em sho (japanische ustuschschüeler). det hemmer thanksgiving gfiiret. mer hend mega vell gässe ond bevor mer gässe hend hemmer no gseid för was dass mer dankbar send. ond öb ers glaubid oder ned, de sho hed meh gässe weder ech... ond etz chonds, ned nor e chli meh sondern öppe 2 oder 3mol so vell wie ech. mer hend truthahn met föllig, härdöpfelstock, squash (en art chörbis, han en ned so gärn gha. esch mega süess), beef, sauce för beidi fleischarte, brot, ergendöppis wo e chli ech wie pastetli, ond no vell anders gha. ond zom desert applepie (ech weiss ned gnau was das esch im dütsche ) ond en mega guete rüeblichueche.

am mäntig han ech denn alli mini husi gmacht. ech han öppe 6 stond lang science gmacht well mer am mettwoch en test gha hend ond echs ned werkli verstande ha. aso d definitione. ech han alles is dütsche öbersetzt. ech han öppe 6 oder 7 site definitione gha am schloss. öbs öppis gnötzt hed weisi leider noni. denn han ech no es franz projekt gmacht ond en änglisch ufsatz. en book review öber de harry potter 1. ech lese die etz alli no uf änglisch. ond wenn denn mis änglisch no chli besser esch, les ech denn au s sebni no einisch. vellecht verstohn ech denn no chli meh. ech be a dem obig mega stolz uf mech gsi, well ech so vell för d schuel gmacht ha. esch eigentli no es guets gfühl gsi. aber ech be denn am zistig glich mega nervös gsi wäg em science test ond ha nomol 3 stond glehrt!!! hesch du das gläse mami??? im ganze 9 stond för en pröfig glehrt!!!

also das esch mis thanksgiving wochenänd gsi. vo mim nöchschte wochenänd geds ned vell z brechte wells s erschte wochenänd esch wo ech deheime verbrenge sett ech do in kanada be. s einzige wo mer müend go mache esch go wenter boots chaufe. well ineme ort 30 meile entfärnt hends höt chnühöch schnee öbercho. tja,.... ech be in kanada. letscht friitig beni no gsi go schwemme ond etz musi jede tag met schnee rächne....

ah jo ond no zo höt (friitig) höt esch no öppis speziells i de schuel gsi. mängisch hemmer füüralarm ond mängisch chömid d drogehönd. d drogehönd send höt cho. mer hend alli mösse im schuelzemmer bliibe ond d polizei esch met de hönd d chäschtli go absueche öb öpper droge versteckt hed. bi mer hends notürli nüt gfonde. sösch wär ech glaub ech scho im flogzüüg. ech weiss ned öbs ergendnöime droge gfonde hend oder ned. aber es esch glich no komisch gsi. vorallem wenn du dech das ned gwöhnt besch. ond ech han notürli usgrächnet i dere stond min dictionnary i mim chästli vergässe. ond notürli hättine brucht. aber was sölls mer hend die andere gholfe. ah jo ond mini fröndin hed gschecht gha ond sie hend alli usem schuelzemmer use müesse ond sech im gang i einere reihe ufstelle ond denn esch en polizest met eme dobermann for dene dore glofe zom luege öb öpper droge bi sech hed. wenn denn aso angst hesch voreme dobermann hesch aso es problem... ond denn hends au no s ganze schuelzemmer abgsuecht öbs droge det enne hed.... aso wenn er mech froged esch es aso zemli andersch z kanada i de schuel weder bi üs. mer losid jo zom bispell ned jede morge de schwiizerpsalm. mer losid jede morge o canada. ech glaub ech könnes scho besser weder d schwiizer hymne. ech weiss zwor de text ned aber d melodie chani glaub scho osswändig.

also das esch glaub gnueg för höt. ech schriibe denn inere woche oder so weder ie. well ech nöchscht wochenänd weder venturers ha. denn geds amigs emmer öppis z schriibe... ah jo ond ech be scho 3 mol i de ziitig gsi met de venturers.  also ganz liebi grüess a alli, ech hoffe üch gods guet,

vanessa

13.10.07 02:07


20. & 21. Oktober

hoi zäme,

öber das wochenänd geds eigentli ned so vell z brechte.

am samstig semmer ufene ensle ond hend dete gösel zäme gsammlet. mer hend mega vell cooli sache gfonde. aber mängisch beni au mega erstunt gsi. mer hend zom bispell es ganzes sofa gfonde, oder eifach es sofa chösse aber das esch so met wasser voll gsoge gsi, dass mer alli öppe 10 minute druf gstande send ond es hed emmer no wasser denne gha. es hed au no es töfli gha. allerdengs esch es mega verrostet gsi. also das chasch nömm bruche. was aber s beste gsi esch, esch en trommele gsi wie mer i afrikanisch felme gsehd. öpper hed gseid wemmer die neu bezieht met fälli, denn esch die öppe 300 dollar wärt.

för mech esch das guet gsi dass ech det gsi be, well ech volunteer hours öber cho ha. das send bi üs d sozialdienst stonde. ech han etz aso mini erste 2.5.  ech weiss send noni werkli vell aber emmerhii en afang.

am sonntig han ech denn eigentli ned vell gmacht. ech han eigentli dänkt das ech mega lang ha a mine science husi, well de lehrer gseid hed es seg secher en halb stond ond ech dänkt ha dass ech no chli länger ha wäg em änglisch. aber ech han denn genau 3 minute ond 51 sekonde gha (ech ha d ziit gstoppet) zom 6 froge beantworte. es esch mega eifach gsi. d näme fo verbendige vo ione ufschriibe. (mer hend etz chemie).

am mäntig esch etz eigentli ned vell gsi. s ufregendsche esch eigentli gsi, dass de busfahrer en panne gha hed ond mer öppe 5 minute hend mösse warte. denn won ech hei cho be esch d elspeth go de alex abhole (esch vo de venturers = pfadi) ond er esch denn üs cho hälfe holz zom huus äne träge, demet mer denn im wenter gnueg hend. ech be glaub ergendwie allergisch uf holz rende a mine ärm. ech han etz ganz roti ärm ond es bisst wie gstört. aber jo,....

ech han i de schuel au no es paar quiz (agseiti bletzer, chas ned besser beschriibe. es send eifach chlini test wie die vom herr lötscher för alli wo die könnid. es ged denn zäme ei note.) ond en ufsatz zrog öber cho. ech be mega stolz uf mech. ech be nämli mega guet im änglisch.  ech ha im ufsatz 78% gha. das entsprecht öppe ineme 4.9 glaubs. ech ha i de letschte 2 76% gha. das heisst ech steigere mech etz emmer bis ech ufeme 4i obe be. (76% = 3, 78% = 3+) im letschte grammatik quiz ben ech die einzig gha wo die volli ponktzahl gha hed.  aso das esch jo wohl secher en applaus wärt.  

also morn chömider denn no meh z ghöre öber well mer morn en lockdown öibig hend. was das gnau esch erklär ech denn morn. oder i mim nögschte blog.

also bis bald,

vanessa

PS: ech hätt eigentli welle es tschüss smiley ine tue aber ech han leider keis gfonde.

22.10.07 23:53


Lockdown

hoi zäme, do chond de versprochnigi itrag zom lockdown.

also am halbi nüni esch d dorchsag cho: This is a lockdown practise. In our school is a police man in his uniform so don't be alarmed.

tja,... ond denn hed de lehrer öppis i das chline fenster bi de töre inetoh, dass niemer cha ine luege ond mer hend üs alli versteckt, dass mer üs ned gseh hed.

i mim science schuelzemmer heds e so spezielle "tische" also so tresen zom labor arbete z mache. mer hend üs denn hender dene versteckt. aso send eifach hender äne ghocket. ond alli hend ergend es buech metgnoh oder musig glost. de lehrer hed üs no gseid am afang vo de stond, mer söllid doch no go es buech hole oder no ufs wc goh. das esch mega realistisch wemmer bedänkt, dass mer jo denn au no schnell cha go es buech hole wenn denn en rechtige lockdown esch. aber jo,... esch jo eigentli glich.

also öppe 20 minute spöter esch denn dä polizist verbii cho ond hed gluegt öb mer eus gnueg guet versteckt hend (mer hend). jo ond denn hemmer no mol öppe 20 minute gwartet ond denn esch denn d dorchsag "all clear" cho ond mer hend weder a eusi plätz chönne.

alles i allem esch es eigentli zemli langwilig gsi, aber jo, etz wössid mer wenigstens was mer müend mache. de grond wiso dass mer die üebig gha hend, esch dass letscht woche 3 schüeler i 3 verschednige schuele aglüte hend, dass sie gseh hend öpper meteme gwehr id schuel i laufe. es hed aber ned gstomme. die hend eifach en lockdown welle demets kei schuel hend. aber trotzdem hed mini schuel gfonde mer üebid das etz einisch wells en mega stress situation esch. ech meine för üs esch es etz kei grossi sach gsi well mer gwösst hend es esch nor en üebig gsi. aber wenns denn ärnst esch chönnt ech denn glaub ned seeleruhig det hocke ond i mim harry potter läse. eusi lehrer hend au vo andere lehrer vo dene 3 schuele verzellt ond die hend gseid es seg mängisch chum ned zom ushalte gsi. vorallem wenn denn d polizei inechond (die chond emmer cho verbii luege zom secher sii, dass sech die person ned ineme schuelzemmer enne versteckt). denn hends zersch ned gwösst öbs etz "nor" d polizei esch oder de amokläufer.

aber jo, bi üs esch es etz jo nor en üebig gsi ond ech hoffe mer müend nie meh en lockdown mache.

ah jo,... was no ganz wechtig esch. mer döfid bineme lockdown schuelzemmer uf gar kei omständ verloh. au ned bineme füüralarm. well es chönnt jo de amokläufer gsi si wo dä usglöst hed, dass alli us de zemmer use grennt chömid.

also das esch min höttig morge die ersti stond gsi.

es chond denn nöchst wochenänd weder en iitrag well mer denn met sts i aerial parc (wie de seilpark ufem pilatus nor grösser) gönd. das werd secher mega loschtig.

also ganz liebi grüess,

vanessa

23.10.07 22:46


Laser Quest

also wie es paar vo üch wössid ben ech am samstig i de nacht met de venturers am laser quest gsi. das esch mega cool gsi.

mer send öppe am 10ni abgfahre (i de nacht). denn semmer öppe am viertel for 11i det gsi. mer hend üs agmäldet ond alles ond denn hemmer en charte meteme selbrige chnopf oder öppis öbercho. det esch denn üse name drof gsi. min name esch venessa gsi. kei ahnig wiso dass die mech ned verstönd wenn ech mine name säge. es anders mol hed öpper bonessa verstande oder menessa.

denn semmer i dä ruum ie ond en metarbeiteri hed üs speli ond d regle erklärt. also d regle vom spell, wie das es fonktioniert ond die allgemeine regle wie ech hocke oder legge ned ab, ech han kei körperkontakt met andere speller, ech spelle fair ond gschiid, ech ha spass ond so wiiter....

denn semmer ine andere ruum ond hend üsi westene agleid. die hend vorne, hende ond a de scholtere liechter gha. wenn du met dinere laser pistole die vo andere hesch chönne träffe hesch pönkt öbercho. du hesch aber mösse ufpasse well wenn dech nämli öpper andersch trefft wärdid der pönkt abzoge.

mer hend 8 verschedeni speli gspellt. die send emmer öppe 15 bis 30 minute gange. denn hemmer en pause gha well en anderi groppe gspellt hed. mer hed die pausene aber werkli chönne bruche well die laser pistolene send no mega schwär ond es esch au mega heiss det enne well du seklisch die ganz ziit ome.

eis speli esch mystery monster gsi. das esch alli gäge alli gsi. öpper esch s mystery monster gsi ond niemer heds gwösst. ned emol s monster sälber. wers am meiste troffe hed hed en freie itrett gwonne. ech ben mega öberrascht gsi dass ech gwonne ha. ech han noni mol gwösst was ech muss mache ond ech han au ned gwösst was ech öberhaupt gmacht ha. aber alli jo du hesch das super gmacht. ond ech so okee....

die hend det mega schnell änglisch gred. oder mer esch es mega schnell vorcho. mer send emmerhi mega spot det gsi. ond mis änglisch werd mega schlächt wenn ech müed be well ech denn vo afo is dütsch öbersetze ond in dütsch dänke ond denn d antwort is änglisch öbersetze. de tagdor wenn ech ned müed be dänk ech eigentli emmer in änglisch. ech bruch au mis wörterbuech (mer muess doch s dütsche wort bruche) nömm so vell.

also das esch mis super wochenänd gsi. am sonntig han ech denn vor allem gschlofe well mer öppe am halbi 7ni hei cho send. ech be so müed gsi. aber mer esch es voll ned so vorcho als wär ech die ganz nacht wäg gsi. ech han ender gmeint es seg ersch grad morge.

etz chond denn grad no en itrag öber s füür i minere schuel wo jo es paar scho bscheid wössid.

ganz liebi grüess,

vanessa

29.10.07 22:04


My School was on Fire

de brand:

öppe 10 minute noch dem dass d mettagspause agfange hed esch de alarm los (öppe am 5 vor 11i). ech be grad im musigruum gsi ond ha mini oboe uspackt well mer för de remembrians day (erennerig förs ändi vom 2. wältchrieg. d schwiegeminute för die tote esch die 11. minute ide 11. stond am 11. tag im 11. monät). mer hend üs alli zemli ufgregt well mer gmeint hend es seg nor en üebig. denn semmer denn aber usem schuelhuus use (mer send öppe 30 lüüt gsi) ond hend denn sofort gseh ond gschmöckt, dass es es rechtigs füür esch. mer hend zwor s füür ned gseh aber de rauch hed mer aso super gseh. es esch en riesigi schwarzi wolke gsi. es hed nor 3 oder 4 rüüm vom musigruum, wo mer alli denne gsi send, ineme labor brönnt. ech weiss eigentli nüt öber de brand. vellecht sägids jo denn i de nochrechte öppis well mer hend gseh dass s färnseh det gsi esch. ond im radio hend sies au die ganz ziit gseid.

uf jede fall semmer öppe 1 stond i de chälti osse gstande. mer hend kei jaggene ond nüt gha well das jo alles i üsne chäschtli gsi esch ond mer das ned hend chönne go hole. s einzige was ech gha ha send mis oboerohr ond min ipod gsi. es paar send det sogar i erne t-shirts gstande. ond es esch maximal 5 grad gsi. ech meine ech be jo schier verfrohre aber die met em t-shirt.... mer hend denn uf jede fall en groppe omarmig gstartet ond jede ond jedi esch cho well mer eifach vell wärmer gha hend. mer hends eigentli no mega loschtig gha well mer hend üs eigentli alli könnt.

noch dere stong hend denn d lehre (wo gfonde hend dass mer alli spennid) üs gseid dass mer etz vöre zo allne andere chönd go (mer send sozäge hender de schuel gsi). mer send also det vöre, hend nomol öppe e viertel stond gwartet ond denn send denn üsi bus cho ond hend üs hei gfahre.

mis problem esch gsi, dass min schlössel förs huus notürli i mim rocksack i mim chäschtli gsi esch ond d elspeth ned dehei gsi esch. ech han also öppe e halb stond oder chli länger gwartet ond denn han ech gfonde dass es eidütig z chalt esch. denn ben ech öppe 10 minute zonere bekannte jogged (det wo mer send go waschbäre füettere). sie hed denn gseid dass sie en schlössel hed well sie amigs god go d hönd useloh. sie hed mech denn aso weder hei gfahre ond mech is huus gloh. ech be so froh gsi well ech fasch verfrore be (ech han jo äbe kei jagge gha).

jo ond denn han ech denn ide elspeth aglüte dass sie mech ned ide schuel muss cho abhole noch de band well ech scho dehei be. sie hed denn gfrogt wiso ond ech han ere verzellt: my school is on fire. sie esch denn ganz gschockt gsi ond hed gfrogt öb ech das ärnscht meine ond ech han jo gseid ond genau i dem momänt won ech das gseid ha hed sies im radio ghört (sie esch im auto onderwägs gsi).

also alles i allem esch es eigentli ned sehr en asträngende tag gsi ond ech glaub ech han do i de schuel z kanada scho meh erläbt weder i 9 johr schuel i de schwiiz.

also ganz liebi grüess,

vanessa

PS: leider chömmer morn scho weder id schuel.

29.10.07 22:21


aktualisierig zom füür

also no chorz neuigkeite zom füür:

es esch ned s labor gsi sondern es auto wo inere garage ene gsi esch. das auto esch also total usbrönnt. es esch etz i de nochrechte im färnseh gsi ond ech han das auto gseh.

es esch niemer verletzt ond mer chönd morn tatsächlech scho weder id schuel.

also das esch eigentli alles.

ganz liebi grüess,

vanessa

29.10.07 23:29





Verantwortlich für die Inhalte ist der Autor. Dein kostenloses Blog bei myblog.de! Datenschutzerklärung
Werbung